RV195 (2012.11.03)

Escrito por em Dec 16, 2012 em Blog, Podcast | 265 comentários

RV195 (2012.11.03)
Play
Radio Verda
http://radioverda.com/programoj/2012/11/3/rv195-20121103.html

  • Rigardi bestidojn helpas produktivon
  • Afrika frukto: plej brila vivaĵo
  • Preventi cerbatakon per ĉokolado?
  • Belugo imitas homan voĉon
  • Kajto – Estu vi mem

Rigardi bestidojn helpas produktivon

Pasigi tempon ĉe la laborejo rigardante fotojn de dolĉaj bestoj povus esti avantaĝe al la firmao. Tion sugestas nova japana esploro.

Esploristoj ĉe la Universitato Hiroŝima okazigis serion da testoj por ekscii la influon de kontakto kun amindaj bestoj sur produktiveco kaj taskoplenumado ĉe homoj. Oni trovis ke la efiko sufiĉe pozitivas.

48 studentojn oni dividis en du grupojn kaj petis ludi ion similan al la ludo Operacio de Milton Bradley, en kiu necesas per pinĉilo zorge tiri pecetojn el kavetoj sen tuŝi la randojn. Fine de la unua rondo, al 24 studentoj oni montris fotojn de bestidoj, dum al la aliaj 24 oni montris fotojn de plenkreskaj bestoj.

Oni trovis ke la studentoj de la unua grupo multe pli sukcesis elpinĉi la pecetojn dum la dua provo, ol la studentoj kiuj rigardis la malpli ĉarmajn fotojn.

Alia eksperimento dividis studentojn en tri grupojn kaj petis ke ili nombru kiom da fojoj aperis iu cifero en nombroserio. Denove, inter la sesioj, al unu grupo montriĝis fotoj de bestidoj, dum al alia montriĝis fotoj de plenkreskaj bestoj.

Ĉi-foje, al tria grupo montriĝis fotoj de plaĉaj manĝaĵoj, inkluzive suŝion kaj bovstekon.

La eksperimentistoj trovis ke la studentoj de la grupo kiu rigardis la ĉarmajn fotojn plenumis la taskon signife supere al la aliaj du grupoj.

La aŭtoroj de la raporto konkludis ke dolĉaj kaj ĉarmaj aferoj ne nur plifeliĉigas nin sed ankaŭ influas nian konduton. Rigardi tiajn aferojn plibonigas postan kapablon en taskoj kiuj postulas zorgan regon de konduto, eventuale per mallarĝigo de atentofokuso.

Antaŭaj esploroj montris ke parolante al beboj, homoj malrapidigas sian paroladon. La japanaj esploristoj teoriigis ke rigardi la dolĉajn fotojn povus efiki simile – malrapidigi la konduton de la koncernaj studentoj kaj plibonigi ilian precizecon en la ludo.

Ĉefaŭtoro psiĥologo Hiroŝi Nittono sugestas ke al oficejoj oni povus voli konsideri aldoni ĉarmajn aŭ amindajn objektojn por instigi zorgeman konduton en specifaj situacioj.

 

Afrika frukto: plej brila vivaĵo

Afrika frukto kompariĝas kun diamantoj pro ĝia eksterordinara splendo.

Nova esploro donis al la gemaj beretoj de la planto Pollia condensata la titolon “plej brila vivaĵo en la mondo”.

Ĉi tiu tropika frukto hejmas en Etiopio, Tanzanio kaj Ugando. Ĝi estas rimarkinda ne nur pro ĝia aparta brileco.

La planto havas specialan tavolon el ĉeloj kiu spegulas lumon kaj donas al la frukto ĝian elektran aspekton.

La impona optika strukturo estas la sola siaspeca ekzemplo en la naturo.

Struktura koloreco estas sufiĉe ofta fenomeno inter bestoj. La vostoplumoj de pavo estas brila ekzemplo.

Sed estas la unua fojo kiam oni dokumentis la trajton ĉe plantoj.

La okulfrapa koloro tre daŭremas, ĉar la frukto ne havas pigmentojn kiuj povas paliĝi, nek pulpon kiu povas putri.

La alloga frukto tamen havas nenian nutran valoron kaj ne manĝeblas.

La brilaj beroj allogas birdojn kiuj ornamas siajn nestojn per ili.

Brilas ne nur la beroj, sed ankaŭ la strategio de la planto. Ĝi sukcesas allogi birdojn sen malŝpari energion produktante nutraĵon por ili.

 

Preventi cerbatakon per ĉokolado?

Dankon al Ĵoakim pro la sekva artikolo:

Manĝi moderan kvanton da ĉokolado ĉiusemajne povas havi ligon kun pli malalta risko de apopleksio ĉe viroj. Tio estas laŭ nova esploro eldonita de la medicina revuo de la Usona Akademio de Neŭrologio.

Dum aliaj esploroj studis kiel ĉokolado povas helpi koran sanon, ĉi tiu estas la unua de sia speco kiu trovis ke ĉokolado povus utili por malpliigi cerbatakojn ĉe viroj.

En la esploro partoprenis pli ol 37 mil svedaj viroj de aĝoj inter 49 kaj 75. Ili ricevis formularon kiu taksis kiom ofte ili konsumis diversajn nutraĵojn kaj trinkaĵojn. Ĝi ankaŭ demandis kiom ofte ili manĝis ĉokoladon. Esploristoj poste identigis okazojn de apopleksioj per malsanulejaj eliroregistroj. Dum dek jaroj, estis 1995 cerbatakoj.

Partoprenantoj kiuj manĝis la plej grandan kvanton da ĉokolado, proksimume unu trionon de taso da pecoj de ĉokolado, aŭ 63 gramojn semajne, havis pli malaltan riskon de apopleksio kompare al tiuj kiuj manĝas neniom da ĉokolado. La ĉokolademuloj havis 17-procente malplian riskon de cerbatako ol la neĉokolademuloj.

En pli granda analizo de kvin esploroj kiuj inkluzivis pli ol kvar mil okazoj de apopleksio, la risko por individuoj en la plej alta kategorio de ĉokoladkonsumo estis 19-procente malpli ol tiuj kiuj ne manĝas ĉokoladon. Je kresko de ĉokoladkonsumo de 50 gramoj semajne, la risko de apopleksio falis je ĉirkaŭ 14 procentoj.

La utila efiko de ĉokolado kontraŭ cerbatako eble rilatas al la flavonoidoj en ĉokolado. Flavonoidoj ŝajne protektas kontraŭ kora malsano per siaj kontraŭoksideco, kontraŭkoaguleco kaj kontraŭinflameco. Eblas ankaŭ ke la flavonoidoj en ĉokolado povus malpliigi koncentriĝojn en la sango de malbona kolesterolo kaj malplialtigi sangopremon.

Interese, estis malhela ĉokolado kiu antaŭe ligiĝis kun avantaĝoj por kora sano, sed proksimume 90 procentoj de la ĉokolado konsumata en Svedio, kaj en la ĵusa esploro, estas lakta ĉokolado.

 

Belugo imitas homan voĉon

Sciencistoj kaptis ĉi tiujn strangajn sonojn…

Surprize, tio estas la voĉo de baleno kiu imitas homojn. Efektive, la balena voko sonis tiel frape homeca, ke plonĝistoj unue kredis ke estis ja homa voĉo.

Jam en 1984, bestistoj de la Nacia Fonduso por Maraj Mamuloj en San-Diego, Usono aŭdis murmuradon el baseno de balenoj kaj delfenoj. Sonis kiel malproksima babilado.

Unu tagon, plonĝisto elakvujiĝis kaj demandis “Kiu diris ke mi eliru?” Nur tiam oni konstatis ke la strangaj vokoj venis de belugo. Dum pluraj jaroj, la sciencistoj registris ĝiajn spontanajn blekojn kaj subakvajn kaj ĉesurfacajn.

Akustika analizo montris ke la homecaj sonoj estis pli basaj ol normalaj balenblekoj je pluraj oktavoj.

La istoj kredas ke proksimeco al homoj ebligis ke la baleno aŭskultis kaj papagis homajn konversaciojn. Ĝi voĉis tiel per ŝanĝo de la premo en siaj nazkavoj. Post kvar jaroj da homimitado, ĝi rekomencis soni kiel baleno, kaj reekblekis altatone. Ĝi mortis antaŭ kvin jaroj.

Delfenojn kaj papagojn oni instruas imiti la ecojn de homa parolado, sed maloftas ke besto faras tion spontane.

Ne temis pri la unua baleno kiu sonas homeca. Sciencistoj kiuj studas blekojn de sovaĝaj blankaj balenoj foje aŭdis sonojn kvazaŭ de kriantaj infanoj. Istoj ĉe la marbestparko de Vankuvero, Kanado diris ke unu blanka baleno tie eĉ diris sian nomon.

Comentários estão fechados.